Бош вазир: Чехия 2025 йилда Россия нефтидан воз кечади
Чехия бош вазири мамлакат 2025 йил ўрталарига бориб Россия нефтига боғлиқликни тўхтатишини айтди. Бу Трансалп қувурини модернизация қилиш туфайли мумкин бўлади.
Dunyo
2024-06-05
589
Чехия Россия нефтига қарамликни 2025 йилнинг биринчи ярми охиригача тўхтатади. Бу ҳақда 4 июн, сешанба куни Mero давлат нефт компаниясига ташрифи чоғида бош вазир Петр Фиала маълум қилди.
Россия нефтидан узоқлашиш Италиядан жанубий Германиягача бўлган Трансалп қувур линиясини (TAL) кенгайтириш ҳисобига мумкин бўлади, у ерда TAL Чехияга олиб борувчи IKL қувурига уланади.
TAL модернизацияси тугаллангач, Чехияга кириб келадиган нефт ҳажми икки баробарга ошиб, саккиз миллион тоннага етади, деди Фиала. «TAL қувурини кенгайтириш бўйича ишлар аллақачон бошланган, биз у 2025 йилнинг биринчи ярмидан кечиктирмай ишга тушишини кутмоқдамиз», деди Чехия бош вазири.
Чехия нефтнинг катта қисмини Россиядан олади
Чехия нефтнинг катта қисмини ҳалигача Россия Федерациясидан совет даврида қурилган «Дружба» қувури орқали олади, деб хабар беради AFP. Россия Федерациясининг Украинага кенг кўламли ҳужумидан сўнг, Европа Иттифоқи Россия нефтини импорт қилишни кенг миқёсда тақиқлаш тўғрисида қарор қабул қилди, аммо «Дружба» қувурини ундан чиқариб ташлади. «Биз бу истиснони имкон қадар тезроқ олиб ташлаймиз», деди Фиала.
2023 йилда Prague Monitor портали Россия нефтининг Чехияга импорти 2012 йилдан бери рекорд даражага етганини хабар қилди. Чехия импортида Россия Федерациясидан нефтнинг улуши 2023 йилнинг биринчи ярмида 65 фоизни ташкил этди.
