Prezident MDH sammitida ishtirok etish uchun Bishkekga yetib keldi
Davlat rahbari birinchi bo‘lib Belarus prezidenti Lukashenko bilan uchrashdi
Jamiyat
2023-10-13
589
13 oktyabr kuni Shavkat Mirziyoyev MDH sammitida qatnashish uchun Bishkek shahriga keldi, deb xabar beradi Prezident matbuot xizmati.
“Manas” xalqaro aeroportida davlat rahbarini Qirg‘iz Respublikasi Vazirlar Mahkamasi Raisi - Prezident Administratsiyasi rahbari Aqilbek Japarov va boshqa rasmiy shaxslar kutib oldi.
Tashrif doirasida Prezident birinchi bo‘lib Belarus Respublikasi rahbari Aleksandr Lukashenko bilan uchrashuv o‘tkazdi.
Davlat rahbarlari savdo-iqtisodiy va gumanitar hamkorlikni kengaytirish masalalarini ko‘rib chiqishdi. Shuningdek, Hukumatlararo komissiyaning navbatdagi yig‘ilishi, Hududlar forumi hamda O‘zbekiston va Belarus universitetlari rektorlarining uchrashuvini tashkil etish haqida so‘z yuritildi.
